Philippine E-Journals

Ang mga Diskurso ng Araling Pilipino na Umiiral sa mga Artikulo ng Malay Journal (The Discourses of Philippine Studies in the Articles of Malay Journal)

Leslie Anne L. Liwanag | May Mojica | Feorillo Petronilo A. Demeterio III

 

Abstract:

Nakabatay ang papel sa paninindigang may limang iba’t ibang diskurso ang araling Pilipino: 1) ang araling Pilipino bilang isang neutral na diskurso; 2) ang kolonyal na araling Pilipino bilang isang diskursong nakabatay sa kapangyarihan ng kanluran at nagpapatibay sa nasabing kapangyarihan; 3) ang generic na postkolonyal na araling Pilipino bilang diskursong pumuna sa hegemonya ng kanluran; 4) ang Pilipinolohiya bilang isang tiyak na postkolonyal na diskursong pinasinayaan ni Prospero Covar; at 5) ang pantayong pananaw bilang isa pang tiyak na postkolonyal na pinasinayaan naman ni Zeus Salazar. Samantala, isang pandalubhasang peryodikal ang Malay Journal para sa mga mananaliksik sa araling Pilipinong nagsusulat sa wikang Filipino. Marahil ito na ang pinakarespetadong journal sa wikang Filipino batay sa akreditasyon nito mula sa Commission on Higher Education (CHED) at sa pagkalista nito sa ilang internasyonal na abstracting at indexing na organisasyon. Layunin ng papel na suriin kung ano ang pinakadominanteng diskurso ng araling Pilipino ang nakapaloob sa mga artikulo ng journal na ito. Para maisakatuparan ang nasabing layunin, hinimay ng papel ang 50% na random sample ng mga artikulo mula 2011, kung kailan lubusan nang nabago ang focus ng journal patungong araling Pilipino hanggang 2015, ang kasalukuyang pinakahuling kumpletong taon ng paglalathala ng journal.