Philippine E-Journals

Mga Saysay ng Nalalabing Tagulaylay sa Malayo: Salin ng mga Piling Tula mula sa Caribbean at Latina Amerika

Marvin Lobos

Discipline: Cultural Studies

 

Abstract:

Layunin ng papel na ito na ilahad ang dokumentasyon ng pagsasalin gayundin ay maghawan ng panimulang pagsipat sa praktika ng araling-salin sa mga tula mula Caribbean at Latina Amerika—mga bayang, tulad ng Pilipinas, ay dumanas ng kolonyalismo at patuloy na binabaka ang mga pilat na iniwan nito sa kasalukuyan. Mahahati ito sa tatlong bahagi. Una, pagtalakay sa ugnayang pampanitikan at pampagsasalin ng Pilipinas at naturang rehiyon. Pangalawa, pagtalakay sa masalimuot na kalikasan ng pagsasalin ng tula, pagbabalik-aral sa mga lapit, at mga konsiderasyon sa itinuturing na mahirap na uri ng pagsasaling pampanitikan. At panghuli, paglalahad sa mga danas, konsiderasyon, at pagpapasya sa aktuwal na proseso ng pagsasalin, at presentasyon ng mga salin. Ang pag-aaral ay ambag sa larangan ng pagsasalin at araling salin, partikular sa praktika ng dokumentasyon ng aktuwal na gawain. Higit sa lahat, sa diwang internasyunalista lalo na’t hindi maitatangging ang mga lunan ay patuloy na nakikibaka para sa ginhawa at dangal ng kani-kanilang sambayanan.